2. സെയ്ഫ്റ്റി നോട്ട് ഗ്യാരന്റീഡ്‌ (റിവ്യു)

നിയമ പ്രകാരമുള്ള മുന്നറിയിപ്പ്: കഥയിൽ ചോദ്യമില്ല (എവിടുത്തെ നിയമം ആണെന്ന് മാത്രം ചോദിക്കരുത്, പ്ലീസ്!!)

ഈ ദിവസങ്ങളിൽ എന്നെ ഏറെ അത്ഭുതപെടുത്തുന്ന സിനിമകൾ എല്ലാം തന്നെ ഞാൻ തന്നെ തിരഞ്ഞു കണ്ടുപിടിക്കുകയും എന്നിട്ടും കാണാതെ സൂക്ഷിക്കുകയും ചെയ്തിരുന്നവ ആണ്. ഇപ്പൊ അത്ഭുദം തോന്നുന്നു. എന്തെ ഇത്ര നാൾ ഇത് കണ്ടില്ല എന്ന്. അപ്പൊ കാര്യത്തിലേയ്ക്ക് കടക്കാം. കോളിൻ ട്രെവേരോവ് സംവിധാനം ചെയ്തു 2012ൽ പുറത്തിറങ്ങിയ സിനിമ ആണ് Safety Not Guaranteed. എന്നെ അത്ഭുതപ്പെടുത്തി എന്ന് പറയുമ്പോ ഏതാണ്ട് മാസ്റ്റർ പീസ്‌ സാധനം ആണെന്ന് തെറ്റിധാരണ വേണ്ട. പക്ഷെ ഈ സിനിമയ്ക്കു ഒരു സൌന്ദര്യം ഉണ്ട്. കാഴ്ചക്കാരനെ അമ്പരപ്പിക്കുന്ന, ഇഷ്ടം തോന്നിപ്പിക്കുന്ന കഥാപാത്രങ്ങൾ ഉണ്ട്. പിന്നെ, ഒരിത്തിരി സസ്പെൻസും. 

കഥ ഇങ്ങനെ. മറ്റുള്ളവർ കാണുന്നത് പോലെ ജീവിതത്തെ കാണാനും സന്തോഷം കണ്ടെത്താനും കഴിയാത്ത ഡാരിയസ് ബ്രിറ്റ്(Aubrey Plaza) ആണ് നമ്മുടെ കഥാനായിക. അമ്മ നേരത്തെ മരിച്ചുപോയ ഡാരിയസ് അച്ഛനോടൊപ്പം ആണ് ജീവിക്കുന്നത്. പഠനത്തിനു ശേഷം Seatlle മാഗസിനിൽ ട്രെയിനീ ആയി ജോലി നോക്കുകയാണ് അവൾ. ഒരു ദിവസം മാഗസിന്റെ എഴുത്തുകാരിൽ ഒരാളായ ജെഫ്(Jake Johnson) ആയിടയ്ക്ക് പത്രത്തിൽ കണ്ട ഒരു പരസ്യത്തെക്കുറിച്ച് ഒരു സ്റ്റോറി ചെയ്യാം എന്ന് പറയുന്നു. ആ പരസ്യം ഇങ്ങനെ ആയിരുന്നു.

Wanted: Somebody to go back in time with me. This is not a joke. P.O. Box 91 Ocean View, WA 99393. You'll get paid after we get back. Must bring your own weapons. Safety not guaranteed. I have only done this once before. 

ഈ പരസ്യത്തിനു പിന്നിലെ രഹസ്യം കണ്ടുപിടിച്ചാൽ അത് സത്യമാണെങ്കിലും അല്ലെങ്കിലും മാഗസിന് നേട്ടം ഉണ്ടാക്കാം എന്ന് മനസിലാക്കിയ അവരുടെ ബോസ്സ് ബ്രിട്ജെറ്റ്(Mary Lynn Rajskub) സ്റ്റോറി ചെയ്യാൻ അനുവാദം നല്കുന്നു. ജെഫ് തനിക്കു സഹായികളായി ഡാരിയസിനെയും അർനൊയെയും (Karan Soni) ആവശ്യപെടുന്നു. അങ്ങനെ അവർ ആ ടൈം മെഷീന് പിന്നിലെ സത്യം കണ്ടെത്താൻ Ocean View ലേയ്ക്ക് പുറപ്പെടുന്നു. ഒരു ജൈവശാസ്ത്ര ഗവേഷണ വിദ്യാരതി ആയിരുന്ന ആർനോ തന്റെ പ്രൊഫൈലിൽ വ്യത്യസ്തമായ എന്തെങ്കിലും ഉണ്ടാവണം എന്നാ ആഗ്രഹം കൊണ്ടാണ് ഈ ജോലിയിൽ ചേർന്നത്‌. വൈകാതെ, മൂവരും ചേർന്ന് പരസ്യത്തിന്റെ ഉടമയെ കണ്ടെത്തുന്നു. അപ്പോഴേയ്ക്കും ജെഫ് താൻ ഈ സ്റ്റോറി തിരഞ്ഞെടുത്തതിന്റെ ശരിയായ ഉദ്ദേശം മറ്റു രണ്ടു പേരോടും വെളിപ്പെടുത്തുന്നു. തന്റെ മുൻ കാമുകിയായ ലിസ്(Jenica Bergere) നെ കണ്ടെത്താൻ വേണ്ടിയാണ് അവളുടെ താമസസ്ഥലത്തേയ്ക്ക് തന്നെ അയാള് വരുന്നത്.

പരസ്യം നല്കിയ ആൾ ഒരു ലോക്കൽ സൂപ്പർ മാർക്കറ്റിലെ ക്ലെർക്ക്‌ ആയ കെന്നത്ത്(Mark Duplass) ആണെന്ന് അവർ കണ്ടെത്തുന്നു. ജെഫ് കേന്നെത്തിനെ സമീപിച്ചെങ്കിലും പെരുമാറ്റത്തിൽ സംശയം തോന്നിയത് കൊണ്ട് കെന്നത്ത് അയാളെ തിരിച്ചയച്ചു. അങ്ങനെ ആ ദൗത്യം ഡാരിയസ്ഏറ്റെടുക്കുന്നു. കേന്നെത്തുമായുള്ള സ്വഭാവ സമാനത കൊണ്ട് ഡാരിയസ് തന്റെ ലക്‌ഷ്യം പെട്ടെന്ന് തന്നെ നിറവേറ്റുന്നു. തന്റെ പിന്നാലെ എപ്പോളും ഗവണ്മെന്റ് എജെന്റുകൾ ഉണ്ട് എന്ന് വിശ്വസിക്കുന്ന കെന്നെത്ത്, പക്ഷെ ഏതാനും പരിശീലന വേളകൾ കൊണ്ട് തന്നെ ഡാരിയനിൽ വിശ്വാസം അര്പിക്കുന്നു. അങ്ങനെ 2 പേരും എന്ത് കൊണ്ട് തങ്ങൾക്കു തിരിച്ചു പോണം എന്നതിനെപറ്റി സംസാരിക്കുന്നു. ഡാരിയനു തന്റെ മരിച്ചു പോയ അമ്മയെ വീണ്ടെടുക്കണം. കേന്നെത്ത്തിനു  തടയേണ്ടത് തന്റെ കാമുകിയായ ബെലിന്ടയുടെ( Kirsten Bell) മരണം ആണ്. അവളുടെ വീട്ടിലേയ്ക്ക് ആരോ മദ്യപിച്ചു കാര് ഓടിച്ചു കയറ്റി അവൾ കൊല്ലപെട്ടു എന്ന് കെന്നത്ത് പറയുന്നു.

ഇതേസമയം, ജെഫ് ലിസ്സിനെ കണ്ടെത്തുന്നു. പഴയ കാര്യങ്ങളെ പറ്റി ഓർമ്മകൾ പങ്കുവെച്ചു അവർ ഒത്തിരി നേരം സംസാരിക്കുന്നു. ഒടുവില, തന്റെ ഒപ്പം വരാൻ ജെഫ് ലിസ്സിനെ ക്ഷണിക്കുന്നു. എന്നാൽ അവൾ ആ ക്ഷണം വിസ്സമ്മതിക്കുന്നു. ഇതിൽ കുപിതനായി തിരികെയെത്തുന്ന ജെഫ് ആർനോയെയും കൊണ്ട് രാത്രി പുറത്തേയ്ക്ക് പോകുന്നു. വഴിയില വെച്ച് കാണുന്ന 3 പെണ്‍കുട്ടികളുമായി അവർ പരിച്ചയപെടുന്നു. ജീവിതം ഒന്നേയുള്ളൂ അത് ആസ്വദിക്കണം എന്ന് അർനൊയൊടു പറയുന്ന ജെഫ് ആ പെണ്‍കുട്ടികളിൽ ഒരാളുമായി ലൈംഗിക ബന്ധത്തിൽ ഏർപ്പെടാൻ അവനെ നിർബന്ധിക്കുന്നു. ആദ്യം എതിർക്കുന്നെങ്കിലും ആർനോ ഒടുവിൽ ജെഫിന്റെ ആഗ്രഹത്തിന് വഴങ്ങുന്നു. 

ഡാരിയസ് അന്ന് കെന്നെത്തിന്റെ കൂടെ അയാളുടെ വീട്ടില് തങ്ങുന്നു. തനിക്കു അറിയാതെ അയാളോട് ഇഷ്ടം തോന്നി തുടങ്ങുന്നതി അവൾ മനസിലാക്കുന്നു. പിറ്റേ ദിവസം ജെഫ്നു ബോസ്സിന്റെ ഫോണ്‍ വരുന്നു. അവർ നല്കിയ വിവരങ്ങൾ വെച്ച് അന്വേഷിച്ചപ്പോൾ ബെലിണ്ട മരിച്ചിട്ടില്ല എന്ന് ബോസ്സ് കണ്ടെത്തുന്നു. ഡാരിയസ് ബെലിണ്ടയെ കണ്ടു സംസാരിക്കുന്നു. അവരില നിന്നും കെന്നെത്ത് അവരുടെ ഒരു അകന്ന സുഹൃത്ത്‌ മാത്രം ആയിരുന്നെന്നും അയാൾ ഒരിക്കൽ ബെലിണ്ടയുടെ കാമുകന്റെ വീട്ടിൽ കാർ ഇടിപ്പിച്ചു കയറ്റി എന്നും ഡാരിയസ് മനസിലാക്കുന്നു. അന്ന് ആര്ക്കും അപകടം ഒന്നും സംഭാവിക്കഞ്ഞത് കൊണ്ടും കേന്നെത്ത്തിന്റെ വ്യത്യസ്തമായ സ്വഭാവം അറിയാവുന്നത് കൊണ്ടും അവർ പോലീസിൽ പരാതിപെട്ടില്ല. അവിടെ നിന്നും പുറത്തിറങ്ങുന്ന ഡാരിയാസിനെ 2 ഗവണ്മെന്റ് എജെന്റുമാർ ചോദ്യം ചെയുന്നു. കെന്നെത്ത് പല ശാസ്ത്രഞ്ഞന്മാരുമായും ബന്ധപെടാരുണ്ടായിരുന്നെന്നും അതുകൊണ്ട് അയാള് ഒരു ചാരാൻ ആണെന്ന് അവർ സംശയിക്കുന്നതായും അവർ പറഞ്ഞു.

ഡാരിയസ് കേന്നെത്ത്തിന്റെ വീട്ടില് മടങ്ങി എത്തി ബെലിണ്ടയുടെ കാര്യം അയാളോട് സംസാരിക്കുന്നു. എന്നാൽ ബെലിണ്ട ജീവനോടെ ഉണ്ടെങ്കിൽ തന്റെ time travel വിജയിച്ചു എന്നാണ് അയാൾ പ്രതികരിക്കുന്നത്. ഇതേ സമയം ഗവണ്മെന്റ് എജെന്റുമാരെപറ്റി മുന്നറിയിപ്പ് നല്കാൻ ജെഫ്ഫ് അവിടെയ്ക്ക് കടന്നു വരുന്നു. സത്യങ്ങള എല്ലാം മനസിലാക്കിയ കെന്നെത്ത് ഡാരിയസ് തന്നെ വഞ്ചിക്കുകയായിരുന്നു എന്ന് വിശ്വസിക്കുന്നു. അയാൾ അവിടെ നിന്നും ഓടി രക്ഷപെടുന്നു. അതെ ദിവസം ആണ് അവർ യാത്രയ്ക്കായി തീരുമാനിച്ചിരുന്നത്. അത് കൊണ്ട് ഡാരിയസ് അയാളെ അന്വേഷിച്ചു അയാൾ നേരത്തെ പറഞ്ഞ സ്ഥലത്ത് എത്തുന്നു. അവളുടെ പിന്നാലെ ജെഫ്, അർണോ, ഗവണ്മെന്റ് എജെന്റുമാർ എന്നിവരും. അവിടെ ഒരു അത്ഭുത വസ്തു അവർ കാണുന്നു. ഒരു സമയ യന്ത്രം. ഡാരിയസ് തൻ അയാളെ വഞ്ചിചിട്ടില്ലെന്നു കേന്നെതിനോട് പറയുന്നു. അയാൾ അവളെ അയാളോടൊപ്പം ക്ഷണിക്കുന്നു. ഇനി താൻ പോകുന്നത് തനിക്കു വേണ്ടി അല്ല ഡാരിയസിന്റെ ഭൂതകാലം ശരിയാക്കാൻ ആണ് എന്ന് കെന്നെത്ത് അവളോട്‌ പറയുന്നു. അവർ ആലിംഗന ബദ്ധരാവുന്നു. അവർ ദീര്ഘമായ ഒരു ചുംബനത്തിൽ മുഴുകി നില്കുന്നതിനു ഇടയ്ക്ക് വെച്ച്( ഇവിടെ ആണ് ഞാൻ സിനിമ അല്പമെങ്കിലും വെറുത്തത്. അത്രയും നേരം ഞാൻ ശരിക്കും ആസ്വദിച്ചിരുന്നു പടം. പക്ഷെ പിന്നീട് വിക്കിപീഡിയയിൽ പടത്തിന്റെ പേരിനൊപ്പം COMEDY എന്ന് കണ്ടപ്പോൾ ആണ് ഇത്തിരി സമാധാനം ആയതു!!! ഹിഹി ) എല്ലാവരും കാണ്‍കെ അവർ രണ്ടു പേരും ആ സമയ യന്ത്രത്തോടൊപ്പം അപ്രത്യക്ഷരാകുന്നു.

വളരെ മനോഹരമായ അവതരണം ആണ് സിനിമയെ വേറിട്ട്‌ നിരത്തുന്നത്. പിന്നെ, ഇതിലെ എല്ലാ കഥാപാത്രങ്ങൾക്കും ഒരു നിഷ്കലങ്ങാത്ത ഉണ്ട്. KPAX കണ്ടു ഞാൻ അതിശയിച്ചതാണ്. ഇടയ്ക്ക് വെച്ച് അതുപോലെ ആവുമോ ഇതും എന്നൊക്കെ തോന്നി. അങ്ങനെ ഒരു പിരിമുറുക്കം സംവിധായകൻ മനപ്പോര്വം സൃഷ്ടിച്ചു വെച്ചിട്ടുണ്ട്. നമ്മളെ കൂടുതൽ പ്രതീക്ഷിക്കാൻ പ്രേരിപ്പിച്ചു കൊണ്ട്. Aubrey Plaza യും Mark Duplassഉം തങ്ങളുടെ ഭാഗം ഭംഗിയാക്കി. യാത്രയ്ക്ക് വേണ്ടി അവർ ഒരുമിച്ചു തയാറെടുക്കുന്ന ഭാഗങ്ങൾ എന്നെ ഒത്തിരി ഇഷ്ടപെടുത്തി. വേറെ ഒരു കാര്യം, നായികയുടെ മുഖഭാവങ്ങൾ ക്യാമറ സൂക്ഷ്മമായി ഒപ്പിയെടുത്തു എന്നുള്ളതാണ്. ഇമോഷന്സ് പ്രകടിപ്പിക്കുമ്പോൾ ഒരു സുന്ദരമായ നിറവ്യത്യാസം സംഭവിക്കുന്ന നായികയുടെ കവിളുകൾ ഓരോ ഷോട്ടിലും എന്നെ ആകര്ഷിക്കുക തന്നെ ചെയ്തു.

പിന്നെ, സമയ യന്ത്രം. അതിനാണ് ആദ്യം ഞാൻ ഒരു പ്രസ്താവന നടത്തിയത്. കഥയിൽ ചോദ്യമില്ല. ഒന്നും ഊഹിക്കാൻ കഥ അവസരം നല്കുന്നില്ല എന്നതാണ് സത്യം. KPAXമായി തട്ടിച്ചു നോക്കിയാൽ കഥ വളരെ ദുർബലം ആണ്.( കഥ സാമ്യം ഉണ്ടായിട്ടല്ല കേട്ടോ. പക്ഷെ, ഇത് കണ്ടിരുന്നപ്പോൾ പലതവണ ആ പടം എന്റെ മനസ്സിൽ വന്നു. ആ റിവ്യു എഴുതാം, പിന്നെ). കഥയിലുള്ള ആ ബലമില്ലായ്മ നല്ല അവതരണ ശൈലി കൊണ്ട് സംവിധായകനും തകര്പ്പാൻ അഭിനയം കൊണ്ട് കഥാപാത്രങ്ങളും മറികടന്നു എന്ന് തന്നെ പറയാം.

IMDB rating : 7.1

Personal Rating: 7.5

1. വാനില സ്കൈ (റിവ്യു)

കുട്ടിക്കാലത്ത് വായനാദിനത്തിന് കാണാപ്പാഠം പഠിച്ചു പറഞ്ഞ പ്രസംഗത്തിലെ ഒരു കാര്യം ഇന്നും ഞാൻ കൃത്യമായി ഓര്ക്കുന്നുണ്ട്. അത് ഒരു വിവരണവും ചിത്രവും തമ്മിലുള്ള വ്യത്യാസത്തെപ്പറ്റി ആയിരുന്നു. അതിങ്ങനെ: "ഒരു രാജാവ് എന്ന് ഞാൻ നിങ്ങളോട് പറഞ്ഞാൽ നിങ്ങള്ക്ക് ചിന്തിക്കുവാൻ അനേകം സാധ്യതകൾ ഉണ്ട്. എന്നാൽ ഒരു രാജാവിന്റെ ചിത്രം ഞാൻ നിങ്ങളെ കാണിച്ചാൽ നിങ്ങളുടെ ചിന്ത അതിലേയ്ക്ക് ചുരുങ്ങുന്നു." സിനിമയ്ക്കും ഇതേ കുഴപ്പമുണ്ട്. എന്നാൽ ചില അപൂർവ്വം ചിത്രങ്ങളുണ്ട്. അത് സൃഷ്ടിക്കുന്ന അപൂര്വം ചില കലാകാരന്മാരും ഉണ്ട്. വായന പോലെ അനേകം സാധ്യതകൾ നല്കുന്ന, ഓരോ നിമിഷവും ചിന്തിക്കാൻ പ്രേരിപ്പിക്കുന്ന സിനിമകൾ അങ്ങനെ ഉള്ളവര്ക്കെ ഉണ്ടാക്കാൻ കഴിയു. അങ്ങനെ ഒരു ചിത്രമാണ് Cameron Crowe സംവിധാനം ചെയ്ത 'Vanila Sky'. Tom Cruise, Penelope Cruz, Kurt Russel, Jason Lee, Cameron Diaz, Noah Taylor എന്നിവര് ആണ് ഇതിൽ പ്രധാന വേഷങ്ങൾ ചെയ്തിരിക്കുന്നത്.

കണ്ടു തുടങ്ങിയപ്പോൾ ഞാൻ കരുതി ഇതാ വീണ്ടും ഒരു psychic ചിത്രം കൂടി എന്ന്. പക്ഷെ, ആ കാർ അപകടത്തിനു ശേഷം നടക്കുന്ന കാര്യങ്ങൾ അവസാനം വരെ ശ്വാസമടക്കിപ്പിടിച്ചു കാണേണ്ടി വന്നു എനിക്ക്. അത്രയ്ക്ക് ഗംഭീരം ആണ് അവതരണ രീതി. പറയാനുള്ളതെല്ലാം സംവിധായകൻ തന്നെ പറയാതെ പ്രേക്ഷകന്റെ സ്വാതന്ത്ര്യത്തിനു വിടുന്ന ശൈലി വേറെയും ഉണ്ടായിട്ടുണ്ട്. പക്ഷെ, ഒത്തിരി വ്യത്യസ്തമാണ് ഈ ചിത്രം. സംവിധയകാൻ Cameron Crowe പറയുന്നത് 5 തരത്തിൽ ഈ സിനിമയുടെ കഥ മനസിലാക്കാം എന്നാണു. 

പിതാവിന്റെ മരണത്തോടെ ന്യൂ യോർക്ക്‌ സിറ്റിയിലെ ഒരു വലിയ പ്രസാധക കമ്പനിയുടെ തലപ്പത്തേയ്ക്കുയര്ന്ന ഡേവിഡ്‌ ആഡംസ്(ടോം ക്രൂയിസ്) ആണ് കേന്ദ്ര കഥാപാത്രം. ഒരു കൊലപാതക കുറ്റം ചുമത്തപ്പെട്ടു ജയിലിൽ ആയ ഡേവിഡ്‌ മനശാസ്ത്രഞ്ജൻ ആയ Dr. Curtis McCabe( Kurt Russel ) നോട് തന്റെ കഥ പറയുക ആണ്. സമ്പത്തിന്റെ എല്ലാ ആർഭാടങ്ങളോടെയും ജീവിച്ച ഡേവിഡ്‌ തന്റെ ജന്മ ദിന പാർട്ടിയിൽ വച്ച് സുഹൃത്തായ Brian Shelby(Jason Lee ) വഴി Sofia Serrano (Penelope Cruz) യെ പരിചയപ്പെടുന്നു. അവർ ആ രാത്രി ഒട്ടേറെ കാര്യങ്ങൾ സംസാരിക്കുകയും പ്രണയത്തിൽ ആവുകയും ചെയുന്നു. സോഫിയയെ പറ്റി അറിഞ്ഞ ഡേവിഡ്‌ന്റെ മുൻ കാമുകി Julianna Gianni(Cameron Diaz) താനും ഡേവിഡ്‌-ഉം സഞ്ചരിച്ചിരുന്ന കാർ അപകടത്തിൽ പെടുത്തി ഒരുമിച്ചു മരിക്കാൻ ശ്രമിക്കുന്നു. ജൂലിയ മരിച്ചു. എന്നാൽ ഡേവിഡ്‌ ജീവിതത്തിലേയ്ക്ക് തിരിച്ചു വരുന്നു. എന്നാൽ അയാളുടെ മുഖം അപകടത്തിന്റെ ഫലമായി വികൃതമാവുന്നു. അത് മറക്കാൻ ഒരു മുഖംമൂടി ഡോക്ടർമാർ അയാള്ക്ക് നല്കുന്നു. എന്നാൽ, സാഹചര്യങ്ങളോട് പൊരുത്തപെടാൻ ആവാതെ ഡേവിഡ്‌ അന്ന് രാത്രിയിൽ ഒരു ബാറിൽ വച്ച് അമിതമായി മദ്യപിക്കുന്നു. സോഫിയ പോയതിനു അയാള് തെരുവില ഒരിടത്ത് തളർന്നു വീഴുന്നു.

(ഇനി ആണ് മക്കളെ  twist) രാവിലെ ഡേവിഡ്‌ ഉറക്കം ഉണരുന്നത് തെരുവില തന്റെ മുന്നില് നില്കുന്ന സോഫിയയെ കണ്ടു കൊണ്ടാണ്. അവർ ഒരുമിച്ചു ജീവിതം മുന്നോട്ടു കൊണ്ട് പോവുകയും ഡേവിഡ്‌ തന്റെ മുഖം പ്ലാസ്റ്റിക്‌ സർജറിക്ക് വിധേയമാക്കുകയും ചെയുന്നു. എന്നാൽ ചില പ്രശ്നങ്ങൾ ഡേവിഡ്‌നു തോന്നത്തുടങ്ങുന്നു. മുഖത്ത് പാടുകൾ ഉണ്ടാവുന്ന പോലെ തോന്നലുകൾ, ബാറിൽ വച്ച് കണ്ടു മുട്ടുന്ന അപരിചിതന്റെ വാക്കുകൽ ഇതെല്ലം അയാളെ പെടിപെടുത്തുന്നു പിറ്റേ ദിവസം സോഫിയയുടെ മുറിയില എത്തുന്ന ഡേവിഡ്‌ അവിടെ കാണുന്നത് ജൂലിയയെ ആണ്. മുൻപ് അയാള് സോഫിയയുടെ മുഖം കണ്ട ഫോട്ടോകളിൽ എല്ലാം ഇന്ന് അയാള് ജൂലിയയുടെ മുഖം കാണുന്നു. എന്നാൽ അയാളെ അതിശയിപിച്ചു ഈ രണ്ടു മുഖങ്ങളും മാറിമാറി പ്രത്യക്ഷപ്പെടുന്നു. വല്ലാത്ത ഒരു മാനസിക വിഭ്രാന്തിയിൽ എത്തുന്ന ഡേവിഡ്‌ ജൂലിയയെ കൊല്ലുന്നു. അവിടെ നിന്നാണ് അയാൾ ജയിലിലും Dr.Curtis ന്റെ പക്കലും എത്തുന്നത്.

ഒരിക്കൽ ഡോക്ടറോട് സംസാരിക്കുന്നതിനിടയിൽ ഡേവിഡ്‌ ജയിലിലെ ടി വി യിൽ 'Life Extension' എന്ന കമ്പനിയുടെ പരസ്യം കാണുന്നു. ഓർമയിൽ എന്തോ കിട്ടിയ ഡേവിഡ്‌ ഡോക്ടരുടെ സഹായത്തോടെ അവിടെ എത്തുന്നു. ഇപ്പോൾ ചികിത്സ ലഭ്യമല്ലാത്ത രോഗങ്ങൾ ഉള്ളവർ മരിച്ചു കഴിഞ്ഞാലുടനെ അവരുടെ ശരീരം പ്രത്യേക സാങ്കേതിക വിദ്യയുടെ സഹായത്തൽ തണുപ്പിച്ചു സൂക്ഷിച്ചു ആ രോഗത്തിനുള്ള പ്രതിവിധി കണ്ടെത്തുമ്പോൾ പുനര്ജീവിപ്പിക്കുന്ന സേവനം ആണ് അവർ നല്കുന്നത്. ഇങ്ങനെ ഉള്ളവർ ഒരു 'lucid dream' ൽ ആയിരിക്കും. ( താൻ സ്വപ്നം കാണുകയാണെന്ന് സ്വപ്നം കാണുന്ന ആള്ക്ക് തോന്നുന്ന അവസ്ഥയാണ് ഇത്) ഇത് മനസിലാക്കിയ ഡേവിഡ്‌ ഡോക്ടറുടെ അടുത്ത് നിന്നും തനിക്കു സാങ്കേതിക സഹായം നല്കാൻ നിയോഗിച്ചിരിക്കുന്ന ആളുടെ പക്കലെയ്ക്ക് എത്തുന്നു. ഇയാൾ ആണ് ഡേവിഡ്‌ മുൻപ് ബാറിൽ വച്ച് കണ്ടു മുട്ടുന്ന അപരിചിതാൻ.(Noah Taylor). 

അയാളുടെ കൂടെ ലിഫ്റ്റിൽ പോകുമ്പോൾ താൻ മരിച്ചിട്ട് 150 വര്ഷം ആയെന്നു ഡേവിഡ്‌ മനസിലാക്കുന്നു. തൻ കമ്പനിയുമായി ഒപ്പ് വച്ച ഉടമ്പടി പ്രകാരം സൊഫിയയുമയി പിരിഞ്ഞ രാത്രി തെരുവില നിന്നും വീട്ടിലെത്തി വേദന സംഹാരികൾ അമിത അളവിൽ കഴിച്ചു മരണമടഞ്ഞ ഡേവിഡ്‌ -ന്റെ ശരീരം കമ്പനി സൂക്ഷിച്ചു വച്ചു. അന്ന് മുതൽ അയാൾ ആ സ്വപ്നത്തിൽ ആയിരുന്നു. എന്നാൽ അയാളുടെ ഉപബോധ മനസിലെ ചിന്തകൾ കൂടിക്കുഴഞ്ഞു ആ സ്വപ്നം ഭീകരമായ ഒരു അനുഭവമായി മാറി. അങ്ങനെ ആണ് അയാള് സോഫിയയെയും ജൂലിയയെയും തമ്മിൽ മാറിപ്പോകുന്നതും തന്റെ അച്ഛന്റെ ഓർമകളിൽ നിന്ന് അത്പോലെ വാത്സല്യം കാണിക്കുന്ന Dr. Curtisനെ സൃഷ്ടിക്കുന്നതും. 

ലിഫ്റ്റിൽ മുകളിൽ എത്തുന്ന ഡേവിഡ്‌നു മുന്നില് 2 അവസരങ്ങൾ ആണ് കമ്പനി വയ്ക്കുന്നത്. ഒന്ന്, അയാളുടെ ഇഷ്ട പ്രകാരം തിരുത്തലുകൾ വരുത്തി ആ സ്വപ്നത്തിൽ തന്നെ തുടരുക. രണ്ടു, യഥാർത്ഥ ജീവിതത്തിലേയ്ക്ക് തിരിച്ചു പോവുക. ജീവിതത്തിൽ ഉടനീളം സ്വപ്നങ്ങൾ മൂലം വലഞ്ഞ ഡേവിഡ്‌ ശരിക്കുള്ള ജീവിതം തിരിയെ വാങ്ങാൻ തീരുമാനിക്കുന്നു. ബ്രയാനും സോഫിയയും യാത്ര പറയാൻ എത്തിയതായി അയാൾ കാണുന്നു. ( ഇപ്പളും കമ്പനി പറഞ്ഞത് അനുസരിച്ച് സ്വപ്നം ആണേ!!) ചെറുപ്പം മുതൽ ഉയരങ്ങൾ പേടി ആയ അയാളോട് പഴയ ജീവിതതിലെയ്ക്കുള്ള തിരിച്ചു പോകളിനുള്ള മാർഗം ആയി നിർദേശിക്കുന്നത് താഴേയ്ക്ക് ചാടുക എന്നാണു. ജീവിതം തിരിച്ചു കിട്ടാൻ ഭയം മറന്നു അയാള് ചാടുന്നു. വീഴ്ചയ്ക്കിടയിൽ ജീവിതത്തിൽ സംഭവിച്ച എല്ലാ കാര്യങ്ങളും അയാളുടെ മനസിൽ മിന്നി മറയുന്നു. നിലം തൊടുന്നതിനു മുന്ന് അയാളുടെ മനസ് ശൂന്യമാകുന്നു. സ്ക്രീനും. പിന്നെ ഡേവിഡ്‌നോട് ഉണരാൻ ആവശ്യപെട്ടുകൊണ്ടുള്ള ഒരു സ്ത്രീ ശബ്ദമാണ് കേള്ക്കുക. ഡേവിഡ്‌ കണ്ണ് തുറക്കുന്ന ക്ലോസപ്പ് ഷോട്ടിൽ പടം പൂർണം ആകുന്നു.

വളരെ മനോഹരം എന്നേ ഇതിനെ വിളിക്കാൻ ആവു. സിനിമയുടെ പേര് വന്നിരികുന്നത് Claude Monet എന്ന ചിത്രകാരന്റെ ഇതേ പേരില് ഉള്ള ചിത്രത്തിൽ നിന്നും ആണ്. ആ ചിത്രം സിനിമയുടെ ഇടയ്ക്ക് കാണിക്കുന്നുമുണ്ട്. 

Claude Monet's Vanilla Sky

സംവിധായകന്റെ നിരീക്ഷണത്തിൽ പല രീതിയിൽ ഈ കഥയെ സമീപിക്കാം.

1. Life Extension പറയുന്നതാണ് സത്യം. ഡേവിഡ്‌ 150 വര്ഷം ഒരു സ്വപ്നത്തിലായിരുന്നു. വീഴ്ചയ്ക്ക് ശേഷം അയാൾ തിരിച്ചു ഉണരുന്നു.

2. സിനിമ മുഴുവനും ഒരു സ്വപ്നം ആണ്. ഡേവിഡ്‌ ന്റെ കാറിൽ ഫെബ്രുവരി 30 എന്ന തിയതി കാണിക്കുന്നുണ്ട്.

3. കാറപകടത്തിനു ശേഷം ഉള്ളതാണ് സ്വപ്നം. 

4. സിനിമയിൽ ബ്രയാൻ എഴുതുന്നതായി പറയുന്ന നോവലിന്റെ കഥയാണ് ഇതെല്ലം.     

പക്ഷെ lucid dream എന്ന അവസ്ഥയാണ് സത്യം എന്നാണ് എനിക്ക് തോന്നിയത്. എന്ത് തന്നെ ആയാലും കാഴ്ച്ചകാരന്റെ ചിന്തയെ പരീക്ഷിക്കുന്ന ഒട്ടനേകം സീനുകൾ സംവിധായകാൻ ഒരുക്കിയിട്ടുണ്ട്. തീര്ച്ചയായും ഈ സിനിമ ഒരു യഥാര്ത സിനിമ ആസ്വാദകനെ തൃപ്ത്തിപെടുത്തുക തന്നെ ചെയ്യും.